ᐅᕙᑦᑎᓅᓕᖓᔪᑦ
ᑐᕌᒐᓱᐊᕐᑕᖏᑦ
ᖄᖏᓐᓂᑯᓕᐅᕐᑎᐅᖏᑦᑐᒍᑦ ᐃᓄᓐᓄᑦ ᑲᑐᑦᔨᖃᑎᒌᑦᑎᐅᓱᑕ ᑎᓕᔭᐅᒪᐅᑎᖃᕐᓱᑕ ᓴᐳᑎᓯᒪᓂᕐᒧᑦ ᐆᒪᔪᕐᓂᐊᕈᓐᓇᐅᑎᖏᓐᓂᒃ ᐃᓄᐃᑦ ᓱᕐᖁᐃᓯᓯᒣᓐᓇᓗᑕᓗ ᐱᑕᙯᓐᓇᕆᐊᖃᕐᓂᖏᓐᓂᒃ. ᐱᒍᑦᔨᔨᐅᑦᓱᑕ ᐱᓇᓱᕝᕕᐅᔪᒍᑦ ᐆᒪᔪᓕᒫᓅᖓᔪᑦ ᐃᓱᐃᓗᑕᖏᓐᓄᑦ ᑐᑭᑕᕐᑎᓯᓂᖃᕐᓗᑕᓗ ᒪᙯᓐᓂᓯ, ᓄᖑᐃᓐᓇᑎᑦᓯᑌᓕᓂᕐᒥ ᖃᐅᔨᓴᕐᓂᒥᓪᓗ.
ᓴᐳᑦᔨᓲᖑᕗᒍᑦ ᐊᖑᕕᒉᒃᑯᓂᒃ ᓂᕈᐊᕐᑕᐅᓲᑦ ᓄᓇᓕᓕᒫᓂ ᓄᓇᓕᒻᒥ ᐆᒪᔪᓐᓂ ᐊᐅᓚᑕᐅᓂᖏᓐᓂᒃ. ᓄᓇᓕᓐᓂ ᐊᑐᓂᑦ ᐊᖑᕕᒉᑦ ᑲᑎᒪᔨᖏᑦ ᒪᙯᑦᑎᐅᕗᑦ, ᒥᑭᒋᐊᓐᓂᐊᑎᐅᑦᓱᑎᒃ ᐃᖃᓪᓕᐊᑎᐅᑦᓱᑎᓪᓘᓃᑦ ᖃᐅᔨᒪᓂᖃᒻᒪᕆᓐᓂᒥᓄᑦ ᓴᕐᕿᑎᑦᓯᓯᐊᕈᓐᓇᓱᑎᒃ ᓄᓇᓕᒻᒥ ᐆᒪᔪᓕᕆᓂᕐᒥ ᓯᕗᓪᓕᐸᐅᑦᔨᒋᐊᓕᓐᓂᒃ ᐃᓱᒫᓘᑎᓂᓪᓗ. ᓇᓗᓀᕐᓯᓲᑦ ᓄᓇᓕᒻᒥ ᐊᐅᓚᑦᓯᓂᓕᕆᓂᕐᒧᑦ ᐱᓂᐊᕐᓂᓂᒃ ᑐᓴᐅᒪᖃᑎᒌᒍᑎᖃᕐᓂᒧᓪᓗ ᐃᓱᒫᓘᑎᓂᒃ ᓄᓇᓕᓕᒫᓄᑦ ᑲᑎᒪᓂᖏᓐᓄᑦ.
ᑐᕌᒐᓪᓚᕆᕗᑦ:
- ᓱᕐᖁᐃᓯᓯᒪᓂᖅ ᓄᖑᐃᓐᓇᑐᐃᓐᓇᑎᑦᓯᑌᓕᓂᕐᒧᑦ ᐆᒪᔪᓂ ᐱᑦᓴᑖᕐᕕᐅᓲᓂᒃ ᑕᑯᓐᓇᓂᖃᕐᓱᑎᒃ ᒫᓐᓇᐅᑎᓪᓗᒍ ᓯᕗᓂᕐᒥᓗ ᐱᑕᖃᑦᓯᐊᕆᐊᖃᕐᓂᖏᑦ;
- ᓴᐳᑦᔨᓯᒪᓂᖅ ᐆᒪᔪᐃᑦ ᓇᔪᒡᒐᔪᓲᖏᓐᓂᒃ;
- ᓱᕐᖁᐃᓯᒪᑦᓯᐊᑎᑦᓯᓂᖅ ᓯᕗᓪᓕᐸᐅᑎᒋᐊᓕᓐᓂᒃ ᐆᒪᔪᕐᓂᐊᓂᕐᓂ ᐊᓯᓕᒫᖏᓐᓂ ᐊᑐᕐᑕᐅᓂᖏᓐᓂ ᐆᒪᔪᐃᑦ;
- ᓱᕐᖁᐃᓯᓯᒪᓂᖅ ᐃᓕᑕᕐᓯᔭᖃᕐᓂᓗ ᖃᓄᐃᓘᕐᑎᐅᓂᖏᓐᓂᒃ ᐃᓄᐃᑦ ᖃᐅᔨᒪᓂᒻᒪᕆᖏᓐᓂᒃ ᐊᐅᓚᑦᓯᖃᑎᒌᓐᓂᒥ ᐆᒪᔪᓂ ᐱᑦᓴᑖᕐᕕᖃᕐᓂᓄᑦ;
- ᐃᓕᓐᓂᐊᑎᑦᓯᓂᖅ, ᐱᒋᐅᕐᓴᑎᑦᓯᓂᖅ ᐃᓄᓐᓂᒃ ᐃᓄᐃᓪᓗ ᐱᓇᓱᕝᕕᖏᓐᓂᒃ ᐊᐅᓚᑦᓯᓂᖃᕐᓂᒧᑦ ᐆᒪᔪᓕᕆᓂᕐᓂ ᓇᒻᒥᓂᖅ.
![](/assets/website/about/env-mission-7050f7df11ca8408ee8a2ce8e7064b892ecd763db7536d9476670405c2559535.png)
![](/assets/website/about/mobile/env-mission-e5adba4f42b3f4a121d905d68db3959e0bf63444a911d5d22f23e5a12b0b893f.jpg)
ᐱᓇᓱᑦᑏᑦ
ᐳᕐᑐᓂᕐᓴᒥ ᐱᓇᓱᑦᑏᑦ
ᐱᓇᓱᑦᑏᑦ
ᐱᓇᓱᖃᑎᖕᖑᕆᑦ
ᐱᓇᓱᒍᒪᔪᑦ ᐱᔪᑦᓴᐅᔮᕈᑎᖏᓐᓂᒃ ᕿᐱᓗᓲᖑᖕᖏᑐᒍᑦ ᐊᕐᕌᒍᓕᒫᒥ ᐱᔪᑦᓴᐅᔮᕈᑏᑦ ᐊᓪᓚᕕᑦᓴᖏᑦ ᐊᑐᕐᓱᒋᑦ ᖃᕆᑕᐅᔭᒃᑯᓘᓐᓃᑦ ᐊᓪᓚᑖᕐᕕᑯᑦ (info@anguvigaq.ca). ᖃᐅᔨᒪᔭᐅᒋᐊᓕᒃ ᐱᔪᑦᓴᐅᔮᕈᑎᓯ ᓇᔪᕐᑎᕆᒐᔭᕋᑦᑎᒋᑦ ᐱᕕᑦᓴᑖᕐᕕᓴᖅ ᓈᒻᒪᓯᖕᖏᓂᖓᓂ.
ᑲᑎᒪᔩᑦ
ᓄᓇᓕᓐᓂ ᑭᒡᒐᑐᕐᑏᑦ
ᑲᑎᒪᔩᑦ
ᑭᒡᒐᑐᕐᑐᒍᑦ ᓄᓇᕕᒻᒥᐅᑦ ᐃᓄᖏᓐᓂᒃ ᐊᑦᔨᒌᖕᖏᑐᓂ ᐆᒪᔪᓕᕆᓂᕐᒥ ᑲᑎᒪᔨᓂ ᐱᓇᓱᖃᑎᒌᑦᑎᓂᓪᓗ ᓄᓇᓕᓕᒫᓐᓂ, ᓄᓇᐅᑉ ᐊᕕᑦᑐᓯᒪᓂᖓᓂ ᑲᓇᑕᒥᓪᓗ. ᑐᑭᒧᐊᑦᑎᓯᓂᖃᕐᓱᑕ, ᑐᑭᑖᕐᓂᓂᒃ ᐊᔪᖀᒋᐊᕐᓂᖃᕐᓱᑕᓗ ᐆᒪᔪᓕᕆᓂᕐᓅᓕᖓᔪᑦ ᐃᓱᐃᓗᑕᖏᓐᓂ ᐊᐅᓚᑦᓯᓂᓕᕆᔨᓄᑦ ᐊᓯᖏᓐᓄᓗ ᓄᓇᕕᒻᒥ ᐱᓇᓱᕝᕕᓄᑦ, ᓱᕐᖁᐃᓯᓯᒪᔭᖃᕐᓂᒧᑦ ᐃᓄᐃᑦ ᖃᐅᔨᒪᓂᖃᕐᓂᖓᑕ ᐃᓪᓕᕆᔭᐅᑦᓯᐊᓂᖓᓂᒃ ᐱᒋᔭᐅᖏᓐᓇᓂᖓᓂᓪᓗ.
ᖃᓄᐃᑦᑐᑐᐃᓐᓀᑦ ᐃᓱᐃᓗᑌᑦ ᑲᒪᒋᔭᐅᓲᑦ ᑖᒃᑯᓇᓂ ᑲᑎᒪᓂᕐᓂ, ᐃᑉᐱᒋᔭᖃᕐᓱᑎᒃ ᓄᓇᕕᒻᒥ ᐆᒪᔪᐃᑦ ᐱᑕᖃᕐᓂᖏᓐᓂᒃ, ᐃᓗᓯᕐᓲᑎᖏᓐᓂᒃ ᐱᔭᐅᒍᓐᓇᓂᖏᓐᓂᓗ ᒪᙯᑦᑎᓄᑦ ᐃᓄᓐᓄᑦ. ᐃᓚᖏᑦ ᐅᖄᔭᐅᓲᑦ: ᐆᒪᔪᐃᑦ ᓄᖑᑐᐃᓐᓇᑎᑕᐅᑦᑌᓕᔪᑦ ᐊᓪᓚᓯᒪᐅᑎᖏᑦ, ᓴᐳᑎᔭᐅᔪᑦ ᐃᓃᑦ, ᐆᒪᔪᓕᕆᓂᕐᒥ ᐊᐅᓚᑦᓯᓂᓕᕆᓂᕐᒧᑦ ᐸᕐᓀᕈᑏᑦ, ᐆᒪᔪᐃᑦ ᐃᓗᓯᕐᓲᑎᖏᑦ, ᐅᓄᕐᓂᖏᑦᑕ ᖃᐅᔨᓴᕐᑕᐅᓂᖏᑦ, ᖃᐅᔨᓴᕐᓂᒧᑦ ᐊᖏᕐᑕᐅᒋᐊᓖᑦ ᐃᑉᐱᔭᐅᓂᖏᓪᓗ, ᓯᕗᓪᓕᐸᐅᔨᒋᐊᓖᑦ ᑮᓇᐅᔭᖃᕐᑎᑕᐅᓂᕐᓄᑦ, ᒥᑭᔫᑎᑦᓯᒋᐊᕐᓂᒧᑦ ᓱᕐᕃᓂᖏᓐᓂᒃ ᐅᔭᕋᓐᓂᐊᑦ ᐊᐅᓚᒍᑏᓪᓗ. ᖃᓄᐃᑦᑐᑐᐃᓐᓀᑦ ᐃᓱᐃᓗᑌᑦ ᑲᒪᒋᔭᐅᓲᑦ ᑖᒃᑯᓇᓂ ᑲᑎᒪᓂᕐᓂ, ᐃᑉᐱᒋᔭᖃᕐᓱᑎᒃ ᓄᓇᕕᒻᒥ ᐆᒪᔪᐃᑦ ᐱᑕᖃᕐᓂᖏᓐᓂᒃ, ᐃᓗᓯᕐᓲᑎᖏᓐᓂᒃ ᐱᔭᐅᒍᓐᓇᓂᖏᓐᓂᓗ ᒪᙯᑦᑎᓄᑦ ᐃᓄᓐᓄᑦ.
ᐃᓚᐅᓃᑦ ᑲᑎᒪᓂᕐᓄᑦ ᑖᒃᑯᓄᖓ ᐱᓇᓱᖃᑎᑦᑕ ᑐᖕᖓᕕᐅᕗᖅ ᓱᕐᖁᐃᓯᓯᒪᔭᖃᕐᓂᒧᑦ ᓯᕗᓪᓕᐸᐅᑎᔭᐅᒋᐊᖃᕐᓂᖏᓐᓂᒃ ᐃᓄᐃᑦ ᖃᐅᔨᒪᓂᖃᕐᓂᖏᑦᑕ ᐊᐅᓚᑦᓯᓂᓕᕆᓂᕐᒥ ᓄᓇᕕᐅᑉ ᓄᓇᖓᓂ ᐆᒪᔪᖏᓐᓂᓗ.
![](/assets/website/about/env-committees-bc11d72ced23fdc8fe21690076616bd8cdf75d6c596a5cc1bbf9a9ebe57433df.jpg)
ᐊᑑᑎᓯᒪᔪᑦ
ᐱᓇᓱᕝᕕᕗᑦ ᓄᐃᑕᐅᓯᒪᔪᖅ ᐱᒍᑦᔨᓱᓂ ᐱᓇᓱᕝᕕᒥᒃ ᑎᓕᔭᐅᒪᐅᑎᓕᒃᑯᑦ ᓄᓇᕕᒻᒥᐅᑦ ᐃᓄᐃᑦ ᒪᙯᑦᑎᖏᑦᑕ ᑭᒡᒐᑐᕐᑕᐅᓂᖏᓐᓂᒃ ᐆᒪᔪᓕᕆᓂᓕᒫᕐᓂ ᐃᓱᐃᓗᑕᓄᑦ, ᓄᓇᒥ ᐃᒪᕕᒻᒥᓗ. ᐱᓇᓱᕝᕕᖑᕐᓯᒪᔪᒍᑦ ᐃᓕᑕᕆᔭᐅᓂᕐᑖᓱᑕ ᖄᖏᓐᓂᑯᓕᐅᕐᑎᐅᖏᑦᑐᒥᒃ ᑲᑐᑦᔨᖃᑎᒌᓐᓂᒧᑦ ᑯᐯᒻᒥ ᐱᓇᓱᕝᕖᑦ ᒪᓕᒐᖏᓐᓂ ᒣ 5, 1995-ᒥ.
ᐃᓄᒃᑎᑐᑦ, ᐱᓇᓱᕝᕕᕗᑦ ᐊᑦᓯᔭᐅᓯᒪᔪᖅ ᐱᕐᖁᓯᑐᖃᑦᑯᑦ ᐱᐅᒃᑯᑎᒥᒃ, ᐊᖑᕕᒐᕐᒥᒃ. ᖃᓪᓗᓈᑎᑐᑦ ᑌᔭᐅᓲᖑᑦᓱᑕ “ᓄᓇᕕᒻᒥ ᒪᙯᓐᓂᒥ ᐃᖃᓪᓕᐊᓂᕐᒥ ᒥᑭᒋᐊᓐᓂᐊᓂᕐᒥᓗ ᑲᑐᑦᔨᖃᑎᒌᑦᑏᑦ” (NHFTA). ᐊᓪᓚᕕᕗᑦ ᓄᐃᑕᐅᓯᒪᔪᖅ ᑰᑦᔪᐊᒥ ᓯᑕᒪᓂᒃ ᐳᕐᑐᓂᕐᓴᑕᖃᕐᓱᓂ ᓂᕈᐊᕐᑕᐅᓱᑎᓗ ᓄᓇᕕᒻᒥ ᒪᙯᑦᑎᓄᑦ ᑭᒡᒐᑐᕐᑎᓄᑦ ᐃᓱᒫᓗᑎᒥᓂᒃ ᓯᕗᓪᓕᐸᐅᑎᒋᐊᓕᓐᓂᓗ. ᐳᕐᑐᓂᕐᓴᖏᑦᑕ ᐃᓚᖓ ᓂᕈᐊᕐᑕᐅᓯᒪᔪᖅ ᒪᙯᓐᓂᖅ ᐃᖃᓪᓕᐊᓂᖅ ᒥᑭᒋᐊᓐᓂᐊᓂᕐᒧᓗ ᑲᑐᑦᔨᖃᑎᒌᑦᑎᓄᑦ, (HFTCC), ᑎᓕᔭᐅᒪᐅᑎᖃᕐᓱᑎᒃ ᐊᕕᑦᑐᓯᒪᐅᑎᑎᒍᑦ 24-ᒥ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᓂ ᕿᒥᕐᕈᓂᕐᒧᑦ, ᐊᐅᓚᑦᓯᓂᕐᒧᑦ ᐃᑉᐱᒋᔭᖃᕐᓂᒧᓪᓗ ᒪᙯᓐᓂᓂᒃ, ᐃᖃᓕᐊᓂᕐᓂᒃ ᒥᑭᒋᐊᓐᓂᐊᓂᕐᓂᓗ ᓄᓇᖃᕐᕕᖏᓐᓂ.
2008-ᒥ, ᓄᓇᕕᒻᒥ ᐃᓄᐃᑦ ᓄᓇᖃᕐᓂᒧᑦ ᐊᖏᖃᑎᒌᒍᑎᖓ (NILCA) ᓄᐃᓚᐅᔪᕗᖅ, ᐃᓕᑕᕐᓯᐅᑎᐅᓕᕐᓱᓂ ᓯᓈᖏᓐᓂ ᐆᒪᔪᓕᕆᓃᑦ ᐊᐅᓚᑦᓯᓂᓕᕆᔭᐅᓂᖏᓐᓂᒃ ᑎᓕᔭᐅᒪᐅᑎᖏᓐᓂ ᐊᖑᕕᒉᒃᑯᑦ ᑎᓕᔭᐅᓂᖏᑦᑕᓗ ᐱᓇᓱᕝᕕᕗᑦᑕ ᓄᑖᒥᒃ ᐊᑦᓯᔭᐅᑦᓱᓂ: ᓄᓇᓕᓕᒫᓂ ᓄᓇᕕᒻᒥ ᐆᒪᔪᓕᕆᔩᑦ ᑲᑐᑦᔨᖃᑎᒌᓐᓂᖓᓂᒃ (RNUK).
ᖁᓕᓪᓗ ᑕᓪᓕᒪᓪᓗ ᓄᓇᓕᓐᓂ ᑲᑐᑦᔨᖃᑎᒌᓐᓃᑦ ᑌᒣᑦᑐᓭᓐᓇᑎᒎᓚᐅᔪᑦ ᓯᕕᑭᓐᓂᓴᒃᑯᖔᖅ ᓄᓇᓕᓐᓂ ᐊᑐᓂᑦ. ᐊᖑᕕᒉᒃᑯᑦ ᓇᓗᓀᕐᑕᐅᒍᑎᖃᕐᓯᒪᒐᓗᐊᕐᓱᑎᒃ ᐊᑦᔨᐅᖏᑦᑑᓂᕐᒥᒍ5 ᐱᓇᓱᕝᕕᐅᓱᑎᒃ ᑯᐯᑉ ᐊᓪᓚᑕᐅᓯᒪᕕᖓᓂ, ᑲᒪᒋᔭᑦᓴᔭᐅᔪᐃᓐᓇᐅᓕᕐᓱᑎᒃ ᐊᖑᕕᒐᒃᑯᓄᑦ ᐊᑕᐅᓯᐅᓕᕐᓯᒪᔪᓄᓪᓗ ᐋᕐᕿᓯᒪᐅᑎᒧᑦ, ᑮᓇᐅᔭᖃᕐᑎᑕᐅᓂᕐᒧᑦ, ᐱᒋᐅᕐᓴᑎᑕᐅᓂᕐᒧᑦ ᐊᐅᓚᒍᓯᕐᒧᓗ. ᑲᑎᒪᔩᑦ ᓄᓇᓕᓕᒫᓂ ᐱᓇᓱᕝᕕᓂ ᐃᓚᓖᑦ ᐊᖓᔪᕐᖄᖏᓐᓂᒃ ᐊᖑᕕᒉᒃᑯᑦ.
![](/assets/website/about/env-history-93bb348e1d92abcabb6aa232db8d555aa024fb9fdae3cef14638fca371970401.png)
![](/assets/website/about/mobile/env-history-5e687b71900737cae44bdc5cda009ed5d8d9be459d9068d121fba63e8261ee2f.jpg)
![](/assets/website/about/footer-8a4f22084fdd8ccec14c83ea332762e8958afa014891aa84a48b600d3f6ea287.jpg)