ᒪᕐᕋᓕᒃ-ᐅᖑᓐᓂᐊᕕᒃ ᐱᓇᓱᐊᕐᑕᐅᔫᒃ
ᒪᕐᕋᓕᒃ-ᐅᖑᓐᓂᐊᕕᒃ ᐱᓇᓱᐊᕐᑕᐅᔫᒃ2021-present
ᒪᕐᕋᓕᒃ-ᐅᖑᓐᓂᐊᕕᒃ ᒪᙯᕝᕕᐅᕘᒃ ᐃᓪᓕᓇᕐᑑᓱᑎᒃ ᕿᓚᓗᒐᕐᓂᐊᕕᐅᑦᓱᑎᒃ ᓄᓇᕕᒻᒥ ᐃᑭᑦᑑᓕᕐᑐᓄᓪᓗ ᐃᓚᒋᔭᐅᑦᓱᑎᒃ ᕿᓚᓗᒐᓰᕕᑐᖃᕐᓄᑦ ᑲᖏᕐᓱᐊᓗᑦᔪᐊᑉ ᓴᓂᐊᓂ. ᒪᙯᕝᕕᐅᖃᔦᕐᑎᑕᐅᓯᒪᔪᖅ 1986-ᒥᓂᑦ ᐅᖓᕙᒥ ᐅᓄᕐᓃᑦ ᓄᖑᑐᐃᓐᓇᕆᐊᖃᕐᓂᕕᓂᖓᓐᓄᑦ, ᑭᓯᐊᓂ ᐅᒃᑯᐃᑕᐅᕐᖃᒥᑦᑑᒃ ᐊᒥᓲᖕᖏᑐᓂᒃ ᕿᓚᓗᒐᕈᓐᓇᓂᕐᒧᑦ ᐊᖏᕐᑕᐅᔪᕕᓂᐅᑦᓱᓂ ᒪᙯᓐᓂᒧᑦ ᐸᕐᓇᓯᒪᐅᑎᖃᕐᓂᒧᑦ. ᓄᓇᖓᑕ ᐅᒃᑯᐊᑕᐅᓂᕕᓂᖓ ᓱᕐᕃᓯᒪᕗᖅ ᐃᓄᐃᑦ ᓂᕿᖃᑦᓯᐊᕆᐊᖃᕐᓂᖏᓐᓄᑦ, ᑭᖑᕚᕇᑦ ᖃᐅᔨᒪᐅᓯᖏᓐᓂᒃ ᐊᒥᕐᖄᖃᑎᒌᓐᓂᒥ, ᐱᕐᖁᓯᑐᖃᒃᑯᑦ ᐱᐅᓯᖃᕐᓃᑦ ᓂᕿᓂᒃ ᐊᕕᖃᑎᖃᓲᖑᓂᕐᒥ, ᑐᓴᐅᒪᔭᐅᒋᐊᓕᓐᓂ ᕿᓚᓗᒐᕐᓅᓕᖓᔪᑦ ᐊᐅᓚᓂᖏᓐᓂ, ᐃᓚᖃᕐᓂᖏᓐᓂᓗ ᐊᐅᓚᑦᓯᓂᓕᕆᓂᕐᒥ ᐱᓇᓱᕝᕖᑦ. ᒪᙯᕐᖃᔭᓚᐅᔪᖕᖏᒪᑕ, ᕿᓚᓗᒉᑦ ᖃᓄᐃᑦᑐᔭᐅᓂᖏᑦ ᑲᑎᕐᓱᑕᐅᖃᑦᑕᓯᒪᖕᖏᑐᑦ ᐃᓄᐃᓪᓗ ᐊᐅᓚᓂᖏᑦ ᑌᑰᓈᖕᖏᓂᕐᓴᕈᕐᓯᒪᑦᓱᑎᒃ, ᑕᒐ ᑐᓴᐅᒪᔭᐅᒋᐊᓕᑦᑕᖃᑦᓯᐊᖏᑦᑐᖅ ᕿᓚᓗᒐᕐᓅᓕᖓᔪᓂ ᑌᑲᓂ.
2021-ᒥ, ᐱᒋᐊᕐᑎᓯᓯᒪᔪᒍᑦ ᐊᕐᕌᒍᓂ ᐊᒥᓱᓂ ᑭᖑᕚᕇᑦᑎᑐᑦ ᖃᐅᔨᒪᐅᓯᕐᒥᒃ ᐊᒥᕐᖄᖃᑎᒌᒍᓐᓇᕕᖃᕐᓂᒧᑦ ᐊᑕᐅᑦᓯᑰᕐᑎᓗᒋᑦ ᐅᕕᒃᑫᑦ ᐱᓇᓱᐊᕐᓂᖏᑦ ᖃᐅᔨᓴᕐᓂᒥᓪᓗ ᐱᓇᓱᐊᕐᑕᐅᔪᑦ. ᖃᐅᔨᓴᕐᓂᒥ ᑐᕌᒐᕆᔭᐅᓗᐊᖕᖑᐊᑐᖅ ᑕᒡᒐᓂ ᐱᓇᓱᐊᕐᓂᖏᓐᓂ ᐊᓪᓚᖑᕐᑎᓯᓂᐅᕗᖅ ᐃᓄᐃᑦ ᖃᐅᔨᒪᐅᓯᖏᓐᓂᒃ ᓄᓇᖓᓅᓕᖓᔪᓂ ᓄᑖᓂᓪᓗ ᐱᖕᖑᑎᑦᓯᓂᕐᒧᑦ ᓱᑯᐃᔦᓂᒃᑯᑦ ᖃᕆᑕᐅᔭᒨᔦᓂᕐᒧᑦ ᓱᕐᖁᐃᓯᔭᖃᕐᒥᔪᑦ ᖃᓄᐃᑦᑐᔭᐅᓂᖏᓐᓂᒃ, ᐅᓄᕐᓂᖏᓐᓂᒃ ᕿᓚᓗᒉᑦ, ᖃᖓᐅᑎᓪᓗᒍ ᑎᑭᔮᓲᖑᓂᖏᓐᓂᒃ ᖃᖓᓪᓗᐊᓗ ᓇᔪᕐᓯᓲᖑᓂᖏᓐᓂᒃ. ᑕᒪᒃᑯᐊ ᑐᓴᐅᒪᔭᐅᒋᐊᓖᑦ ᑲᑎᕐᓱᑕᐅᖃᑦᑕᑐᑦ ᐱᑦᔪᑎᓖᑦ ᐱᑕᖃᕐᑎᓯᓂᕐᒧᑦ ᐊᐅᓚᑦᓯᓂᓕᕆᔩᑦ ᐱᓇᓱᕝᕕᖏᓐᓂᒃ ᓈᒻᒪᑐᓂᒃ ᑐᓴᐅᒪᔭᐅᒋᐊᓕᖃᑦᑎᓯᓂᕐᒧᑦ, ᐃᓚᒋᔭᐅᑎᓪᓗᒋᑦ ᐃᓄᐃᑦ ᖃᐅᔨᒪᐅᓯᖏᑦ, ᑐᑭᓯᒪᑦᓯᐊᓗᑎᒃ ᑐᑭᑖᕈᓐᓇᖃᑦᑕᓂᕐᒧᑦ ᐅᒃᑯᐊᓯᓂᐅᒐᔭᕐᑐᓄᑦ ᓯᕗᓂᕐᒥ ᐊᐅᓚᑦᓯᓂᓕᕆᓂᕐᒧᑦ ᐸᕐᓇᓯᒪᐅᑎᓂᒃ ᐃᓄᓐᓂᓗ ᓄᑭᖃᕐᑎᓯᒋᐊᕐᓂᒧᑦ ᓇᒻᒥᓂᖅ ᐊᐅᓚᑦᓯᓂᓕᕆᓂᕐᒥ ᖃᐅᔨᓴᕐᓂᒧᑦ. ᐱᓇᓱᐊᕐᑕᐅᓂᖓ ᐃᓗᓕᖃᕋᔭᕐᑐᖅ ᐆᒪᔪᓂᒃ ᑲᒪᐅᑎᓄᑦ ᓄᐊᑦᓯᒍᑎᓂᒃ, ᓄᓇᒥ ᑐᖕᖓᕕᓕᓐᓂᒃ ᐅᒥᐊᒃᑯᓗ ᐃᑉᐱᒍᓲᑏᑦ, ᐆᑦᑐᕋᐅᑏᑦ ᖃᓄᐃᑦᑐᔭᐅᓂᖏᓐᓂᒃ, ᐊᐱᕐᓱᓂᕐᓂᓗ ᐱᕐᖁᓯᑐᖃᒃᑯᑦ ᖃᐅᔨᒪᐅᓯᑐᖃᕐᓂᒃ ᐃᓗᓕᕐᑐᐃᓂᕐᒧᑦ ᐅᓪᓗᒥ ᖃᐅᔨᒪᐅᓯᕐᓂ ᐱᑕᖃᕈᓐᓀᑐᓂᒃ. ᑕᒪᓐᓇ ᐱᓇᓱᐊᕐᓂᓕᒫᖅ ᑐᖕᖓᕕᓕᒃ ᖃᐅᔨᒪᐅᓯᕐᒥ ᐃᓕᓐᓂᐊᑎᑦᓯᓂᕐᒧᑦ ᐅᕕᒃᑲᓄᑦ. ᐅᕕᒃᑫᑦ ᐃᓚᐅᔪᖅ ᐱᓇᓱᐊᕐᓂᒧᑦ ᐃᓕᓐᓂᐊᓲᑦ ᓲᓱᑦᓴᓯᐊᕐᓱᑎᒃ ᒪᙯᓐᓂᒥᒃ, ᓂᕿᓕᕆᓂᕐᒥᒃ, ᖃᐅᔨᓴᕈᓯᕐᓂᒃ, ᐆᒪᔪᓂᒃ ᐊᐅᓚᑦᓯᓂᓕᕆᓂᐅᑉ ᐋᕐᕿᓯᒪᐅᑎᖓᓂᒃ, ᐊᓐᓇᐅᒪᒍᓐᓇᓂᕐᓂᒃ, ᓈᓚᖃᑦᑕᓱᑎᓗ ᐃᓄᑐᙯᑦ ᐊᒥᕐᖄᑎᖃᕈᑎᖏᓐᓂᒃ ᖃᐅᔨᒪᐅᓯᕐᒥᓂᒃ ᐅᓂᒃᑳᖏᓐᓂᓗ ᐱᐊᕋᐅᓂᕕᓂᕐᒥᓂᒃ.