ᕿᑭᕐᑕᑯᑖᕐᒥ ᒪᙯᓐᓂᖅ
ᕿᑭᕐᑕᑯᑖᕐᒥ ᒪᙯᓐᓂᖅ2023
ᐃᓄᐃᑦ ᑰᑦᔪᐊᕌᐱᒻᒥᐅᑦ, ᐅᒥᐅᔭᒥᐅᑦ ᐃᓄᒃᔪᐊᒥᓪᓗ ᓱᕐᕋᑕᐅᓯᒪᕗᑦ ᐃᑉᐱᒋᔭᐅᒻᒪᕆᓐᓂᖏᓐᓄᑦ ᐅᓄᕐᓂᖃᕐᑎᓯᒍᑎᓄᑦ ᕿᓚᓗᒐᕐᑕᐅᕈᓐᓇᑐᓂᒃ. ᑖᒃᑯᐊ ᓄᓇᓖᑦ ᐃᓄᑦᑕᓖᑦ ᐊᑯᓐᓂᖏᓐᓂ, ᐅᓄᕐᓂᐹᑦ ᕿᓚᓗᒐᕐᑕᐅᕈᓐᓇᑐᑦ 20 ᒣᒥᑦ ᓄᕕᐱᕆᒧᑦ ᑎᑭᑦᓱᒍ ᐊᕐᕌᒍᑕᒫᑦ ᑕᓯᐅᔭᕐᔪᐊᑉ ᓯᕿᓂᖓᑕ ᓂᐱᕕᐊᓂ. ᑕᒪᓐᓇ ᓱᕐᕃᓯᒪᕗᖅ ᓂᕿᖃᕐᓂᒥᒃ, ᑭᖑᕚᒌᑦᑎᑐᑦ ᖃᐅᔨᒪᐅᓯᕐᒥᓂᒃ ᐊᒥᕐᖄᖃᑎᒌᓐᓂᓂᒃ ᐃᓗᕐᖁᓯᒃᑯᓗ ᑭᓇᐅᓂᖃᕐᓂᒥᓐᓂᒃ. ᕿᑭᕐᑕᑯᑖᖅ, ᓇᑯᕐᑐᖅ ᐃᓚᒋᔭᐅᒻᒪᑦ ᐃᑭᑦᑐᓄᑦ ᓱᕐᕋᑕᐅᒪᖕᖏᑐᓄᑦ ᓄᓇᓕᓐᓂ ᐅᓄᕐᓂᖃᕐᑎᓯᒍᑎᓄᑦ ᐱᔭᐅᒍᓐᓇᑐᓂᒃ. ᑖᒃᑯᐊ ᓄᓇᓖᑦ ᐱᖓᓱᑦ ᐊᔪᐃᓐᓇᓂᖃᓲᖑᓕᕐᑐᑦ ᒪᙯᓐᓂᒧᑦ ᕿᑭᕐᑕᑯᑖᒥ ᓲᓱᑦᓴᓂᕐᒧᑦ ᒪᙯᓐᓂᒥ ᓱᕐᖃᔭᖕᖏᕈᑎᖃᕐᑎᓯᒍᑎᓂ ᓄᓇᓕᓐᓄᑦ ᖃᓂᑦᑐᓂ. ᑌᒣᒐᓗᐊᕐᑎᓗᒍ, ᕿᑭᕐᑕᑯᑖᓕᐊᕐᓂᖅ ᑌᒪᖕᖓᒐᓛᖅ ᐊᑦᑕᓇᕐᑑᓲᖅ ᖃᐅᔨᒪᓇᕋᓂᓗ ᖃᓄᐃᑦᑑᓂᐊᕐᒪᖔᑦ. ᒪᙯᑦᑏᑦ ᐊᑦᑕᓇᕐᑐᒦᑦᑎᖃᑦᑕᓯᒪᓕᕐᑐᑦ ᐃᓅᓯᕐᒥᓂ ᐅᒦᔭᖃᑦᑕᓯᒪᓕᕐᓱᑎᓗ ᐱᔭᕆᐊᑐᔫᑎᓪᓗᒍ. ᕿᓚᓗᒐᕐᑐᖃᑐᐊᕐᒪᑦ ᒪᙯᑦᑏᑦ ᐊᓂᕐᕋᓵᕈᒪᓂᖃᓯᓲᑦ, ᖃᓄᐃᑦᑑᒐᓗᐊᕐᒪᑎᒃ ᓯᓚᐅᑉ ᐱᐅᓯᖓ ᐃᒪᐅᓪᓗ ᖃᓄᐃᑦᑑᓂᖓ, ᐆᒪᔪᕐᑕᖓ ᐊᓯᐸᑐᐃᓐᓇᖁᓇᒍ. ᐊᓯᐊᒍᓪᓗ, ᓅᓚᖓᖕᖏᑐᐊᕈᑎᒃ ᓯᓚᑦᓯᐊᖑᕐᓰᓗᑎᒃ ᕿᑭᕐᑕᒥ, ᓂᖀᑦ ᓱᒃᑯᓇᕐᓯᑐᐃᓐᓇᕈᓐᓇᑐᑦ ᖃᓂᒪᓐᓇᑐᕈᕈᓐᓇᓱᑎᒃ ᓄᓇᓕᒻᒥᐅᓂᒃ ᐃᓱᐃᑦᑐᒨᕐᑎᓯᓚᕿᓗᑎᒃ. ᐱᓇᓱᐊᕐᑕᐅᔪᒥ ᑐᕌᒐᓱᐊᕐᑕᐅᔪᑦ ᓇᑉᐯᓂᐅᕗᖅ ᐃᓪᓗᐊᐱᓐᓂᒃ ᖁᐊᖃᐅᑎᑖᕐᑎᓯᓂᕐᓗ ᕿᑭᕐᑖᓗᒻᒥ ᓴᐳᑎᓯᒪᓂᕐᒧᑦ ᒪᙯᑦᑎᓂᒃ ᐃᓅᓯᕐᒥᓂᒃ ᐊᑦᑕᓇᕐᑐᒦᑦᑎᓯᓲᓂᒃ ᖃᓄᐃᖕᖏᓯᐊᕆᐊᖃᕐᓂᖏᓐᓂᓗ ᓄᓇᓕᒻᒥᓂᒃ ᓂᕿᖃᕐᑎᓯᒐᓱᐊᕐᓱᑎᒃ. ᓄᓇᓕᓐᓂᒃ ᓴᐳᑎᓯᒪᓚᖓᒻᒥᔪᒍᑦ ᐆᒪᔪᕐᓯᐅᕆᐊᕐᓯᒪᔪᓂᒃ ᕿᑭᕐᑕᒧᑦ, ᓱᕐᖁᐃᓯᓯᒪᓂᕐᒧᑦ ᐱᐅᒃᑯᑎᖃᑦᓯᐊᕆᐊᖃᕐᓂᖏᑦ. ᓯᕗᓂᕐᒥ, ᑕᒪᓐᓇ ᑭᖑᕚᒌᑦᑎᑐᓄᑦ ᐊᒥᕐᖄᖃᑎᒌᒍᑕᐅᖁᔭᕗᑦ.