ᓇᓅᑉ ᐅᓂᒃᑳᖏᑦ: ᓇᓄᕐᓅᓕᖓᔪᑦ ᑕᑯᓐᓇᕋᑦᓭᑦ

ᓇᓄᐃᑦ ᑐᖕᖓᕕᐅᓲᖑᕗᑦ ᐃᓄᐃᑦ ᐃᓅᓯᖏᓐᓂ, ᖃᓄᐃᖕᖏᓯᐊᕐᓂᖏᓐᓂ, ᐃᓗᕐᖁᓯᒃᑯᓗ ᐃᓄᐃᑦ ᓄᓇᓕᒫᖏᓐᓂ, ᐊᑦᑕᓇᕐᑐᒦᖏᓐᓇᓲᖑᑦᓱᑎᓗ ᓱᕐᕃᓯᒪᔪᓂᒃ ᓇᔪᒡᒐᔪᓲᖏᓐᓂ ᓄᓇᓂ ᐅᓄᕐᓂᖏᓐᓂᓗ, ᐃᓚᒋᔭᐅᑎᓪᓗᒋᑦ ᓯᑯᖃᑦᓯᐊᓲᖑᒍᓐᓀᑐᖅ ᐊᐅᓚᒐᓱᐊᕐᓗᒋᓪᓗ ᐱᔭᕆᐊᑐᔫᑦᓱᓂ ᐊᑕᐅᑦᓯᑰᕐᑎᑕᐅᑦᓯᐊᖏᓐᓂᑯᖏᓐᓄᑦ ᓄᓇᓕᓕᒫᓂ ᑐᓴᐅᒪᖃᑎᒌᒍᑕᐅᑦᓯᐊᖏᓐᓂᖓᓗ. ᓇᓄᐃᑦ ᓄᓇᒦᓐᓂᓴᕈᕐᐸᓕᐊᒐᒥᒃ, ᓇᓄᖃᓲᖑᓕᕐᑐᑦ ᕙᓪᓕᐊᑐᐃᓐᓇᓚᖓᑦᓱᓂᓗ ᓄᓇᓕᓐᓂ ᓯᓈᓂᒥᐅᓂ. ᐊᒻᒪᓗ ᐃᓄᐃᑦ ᐊᑑᑎᓲᖏᑦ ᖃᐅᔨᒪᐅᓯᖏᓪᓗ ᓇᓄᕐᓅᓕᖓᔪᓂ ᐊᐅᓚᑦᓯᓂᓕᕆᓂᖃᑦᓯᐊᕋᓂ ᑐᑭᑖᕈᑎᖃᕐᓂᒧᑦ ᒪᓕᒐᓕᐅᕐᓂᒥ. ᐃᓄᐃᑦ ᑐᑭᒧᐊᑦᑎᓯᒋᐊᖃᕐᓂᖏᑦ ᓇᓄᕐᓂᒃ ᐊᐅᓚᑦᓯᓂᓕᕆᓂᕐᒥ, ᑕᒣᓐᓂᒃ ᐃᓄᓐᓂᒃ ᓇᓄᕐᓂᓗ ᐊᑦᑕᓇᖕᖏᑐᒦᑦᑎᓯᓂᕐᒧᑦ ᐊᓯᑦᔨᐸᓪᓕᐊᔪᓂ ᐃᓂᓐᓂ, ᐱᓂᕐᐸᐅᓲᖑᓕᕐᑐᖅ. ᑕᒪᓐᓇ ᐊᕐᕉᒍᓂ ᐊᒥᓱᓂ ᐱᓇᓱᐊᕐᑕᐅᓂᖓ ᐃᑉᐱᒋᔭᓕᒃ ᐊᓪᓚᖑᕐᑎᑕᐅᓂᖏᓐᓂᒃ, ᐊᓯᐅᔨᑦᑌᓕᓂᕐᒥᒃ ᑐᓴᐅᒪᖃᑎᒌᒍᑎᖃᕐᓂᒥᓪᓗ ᐃᓄᐃᑦ ᖃᐅᔨᒪᐅᓯᖓᓂᒃ ᓇᓄᕐᓅᓕᖓᔪᓂᒃ ᐱᑐᑦᓯᒪᓂᖏᓐᓂᓗ ᓄᓇᓕᓐᓄᑦ ᓴᐳᑦᔨᓯᒪᓂᕐᒧᑦ ᐃᓄᓐᓄᑦ ᐊᐅᓚᑕᐅᔪᒥᒃ ᓇᓄᓕᕆᓂᕐᒥ ᓄᓇᕗᒻᒥ, ᓄᓇᕕᒻᒥ ᓄᓇᑦᓯᐊᕗᒻᒥᓗ. ᑕᒪᓐᓇ ᐱᓇᓱᐊᕐᑕᐅᔪᖅ ᐊᓪᓚᖑᕐᑎᓯᕗᖅ ᐃᓄᐃᑦ ᖃᐅᔨᒪᐅᓯᖏᓐᓂᒃ, ᐃᑉᐱᒋᔭᖃᕐᓂᖏᓐᓂᒃ ᐱᑐᑦᓯᒪᓂᖏᓐᓂᓗ ᓇᓄᕐᓄᑦ ᑕᑯᓐᓇᕋᑦᓴᑎᒍᑦ ᐊᐅᓚᔪᒃᑯᑦ, ᑖᒃᑯᐊᓗ ᑕᑯᓐᓇᕋᑦᓭᑦ ᐊᑐᓲᖑᑦᓱᒋᑦ ᐃᓕᓐᓂᐊᑎᑦᓯᓂᕐᒧᑦ ᖃᐅᔨᓴᕐᓂᒨᓕᖓᔪᓄᓪᓗ. ᐱᓇᓱᖃᑎᒌᑦᑐᑦ ᑕᒪᑦᓱᒧᖓ ᐱᓇᓱᐊᕐᑕᐅᔪᒧᑦ ᑑᕐᙰᑦ ᓄᓇᖏᓐᓂ ᐆᒪᔪᓂ, ᐱᕈᕐᑐᓂ ᐃᖃᓪᓕᐊᓂᕐᒥᓗ ᐊᓪᓚᕕᒻᒪᕆᖓᓂ ᐊᒻᒪᓗ ᓄᓇᕕᒻᒥ ᐃᒪᕐᒥᐅᑕᓕᕆᓂᕐᒥ ᓄᓇᓕᓕᒫᓂ ᐆᒪᔪᓕᕆᓂᕐᒥ ᑲᑎᒪᔩᑦ.